இன்றைய இளைஞர்கள் சமூக ஊடகங்களில் பலவிதமான தகவல்களைப் பகிர்கிறார்கள். புகைப்படங்கள், நிகழ்படங்கள், தனிப்பட்ட அனுபவங்கள், மனநிலை குறிப்புகள் போன்றவை பொதுவானவை. சிலர் கடந்தகால கசப்பான அனுபவங்களையும் பகிர்கிறார்கள்.

இளைஞர்கள் இவற்றைப் பகிர்வதற்கு பல காரணங்கள் உள்ளன. மற்றவர்களின் கவனத்தை ஈர்க்க விரும்புவது, ஆதரவு பெற விரும்புவது, தனிமையை போக்க நினைப்பது ஆகியவை முக்கிய காரணங்கள். சிலருக்கு தங்கள் உணர்வுகளை வெளிப்படுத்துவது மன நிம்மதி தரும்.

ஆனால் சில விடையங்களை பகிர்வது நல்லதல்ல என்று நான் நினைக்கிறேன். குடும்ப பிரச்சனைகள், மற்றவர்களைப் பற்றிய எதிர்மறையான கருத்துகள், தனிப்பட்ட முகவரி அல்லது பணம் சம்பந்தமான தகவல்களை பகிரக்கூடாது. இவை ஆபத்தை ஏற்படுத்தலாம். இணையத்தில் பகிர்ந்ததை முழுமையாக நீக்க முடியாது என்பதை நினைவில் கொள்ள வேண்டும்.

நட்பு வாழ்க்கையில் மிக முக்கியமான உறவு என்று நான் நம்புகிறேன். நல்ல நண்பன் என்பவன் என்னை உண்மையாக புரிந்துகொள்பவன். என் மகிழ்ச்சியிலும் துன்பத்திலும் என்னுடன் இருப்பவன். நம்பிக்கைக்குரியவனாகவும் நேர்மையானவனாகவும் இருப்பான்.

நான் நண்பர்களுடன் தொடர்பு வைத்திருக்க பல வழிகளைப் பயன்படுத்துகிறேன். பாடசாலையில் தினமும் சந்திப்போம். வாரயிறுதிகளில் ஒன்றாக விளையாடுவோம். தொலைவில் உள்ள நண்பர்களுடன் நிகழ்படப் பேச்சு மூலம் தொடர்புகொள்வோம். எதிர்காலத்தில் எல்லோரும் வெவ்வேறு நகரங்களுக்கு சென்றாலும் தொழில்நுட்பம் மூலம் தொடர்பில் இருக்கலாம்.

இன்றைய சமுகத்தில் நட்புக்கு பல சவால்கள் உள்ளன. சமூக ஊடகங்கள் மேலோட்டமான உறவுகளை உருவாக்குகின்றன. நேரடியாக சந்திப்பது குறைந்துவிட்டது. போட்டி மனப்பான்மையும் பொறாமையும் நட்பை சிதைக்கின்றன. ஆனால் உண்மையான நட்பு இவற்றையெல்லாம் தாண்டி நிலைத்து நிற்கும்.

கிளாஸ் கிரவெலியுஸ் கூறிய «நட்பு என்பது உழைப்பு» என்ற கூற்றை நான் முழுமையாக ஏற்றுக்கொள்கிறேன். நட்பு தானாக வரும் என்று பலர் நினைக்கிறார்கள், ஆனால் அது உண்மையல்ல.

நட்பை பராமரிக்க நேரமும் முயற்சியும் தேவை. நண்பர்களுடன் தொடர்பு வைத்திருக்க வேண்டும். அவர்களின் பிரச்சனைகளைக் கேட்க வேண்டும். சில சமயங்களில் விட்டுக்கொடுக்க வேண்டும். கருத்து வேறுபாடுகள் ஏற்படும் போது பொறுமையாக பேச வேண்டும்.

இருவரும் மாறுவது என்பதும் உண்மையே. நண்பர்கள் மூலம் நாம் புதிய கண்ணோட்டங்களை கற்றுக்கொள்கிறோம். நமது குணங்களும் பழக்கங்களும் மாறுகின்றன. நல்ல நண்பர்கள் நம்மை சிறந்த மனிதர்களாக மாற்றுவார்கள். ஆகையால் நட்பு நிச்சயமாக முயற்சி தேவைப்படும் ஒரு அழகான பயணம்.

கருத்து வேறுபாடுகள் வாழ்க்கையில் இயல்பானவை. கடந்த மாதம் என் நெருங்கிய நண்பன் சுரேஷுடன் ஒரு கருத்து வேறுபாடு ஏற்பட்டது. பாடசாலையில் ஒரு குழு திட்டப்பணியை எப்படி செய்வது என்பது பற்றி நாங்கள் உடன்படவில்லை.

நான் திட்டப்பணியை ஒழுங்காக திட்டமிட்டு படிப்படியாக செய்ய வேண்டும் என்று நினைத்தேன். ஆனால் சுரேஷ் கடைசி நேரத்தில் செய்தால் போதும், இப்போது நேரத்தை வீணாக்க வேண்டாம் என்று வாதிட்டான். நான் முன்கூட்டியே செய்வது தரமான வேலையை உறுதி செய்யும் என்றும், கடைசி நேர அவசரம் பிழைகளை ஏற்படுத்தும் என்றும் விளக்கினேன்.

இறுதியில் ஒரு சமரசத்தை காணினோம். முதல் வாரத்தில் ஆராய்ச்சி செய்து தகவல்களை சேகரிப்பது என்றும், இரண்டாவது வாரத்தில் எழுதுவது என்றும் முடிவெடுத்தோம். இருவரும் விட்டுக்கொடுத்ததால் திட்டப்பணி நன்றாக முடிந்தது.

கருத்து வேறுபாடுகளை சமாளிக்க பல வழிகள் உள்ளன. முதலாவதாக, பொறுமையாக மற்றவரின் கருத்தை கேட்க வேண்டும். இரண்டாவதாக, கோபமடையாமல் அமைதியாக பேச வேண்டும். மூன்றாவதாக, விட்டுக்கொடுக்கும் மனப்பான்மை இருக்க வேண்டும். நான்காவதாக, பிரச்சனையை தீர்ப்பதில் கவனம் செலுத்த வேண்டும், நபர்களை குற்றம் சாட்டுவதில் அல்ல. கருத்து வேறுபாடுகள் சரியாக கையாளப்பட்டால் உறவுகளை வலுப்படுத்தும் என்பதே உண்மை.